Россиядә әти-әниләрнең күпчелеге мәктәп дәресләрендә мобиль телефоннар куллануны чикләүне уңай бәяли.
Superjob сервисы РИА Новости өчен үткәргән сораштыру нәтиҗәләренә караганда, әти-әниләрнең 83 проценты мәктәптә телефоннарны тыюны хуплый.
Тикшеренү мәгълүматлары буенча, бары тик 8 процент әти-әни әлеге чикләүгә каршы чыккан, ә тагын 9 проценты үз фикерен төгәл белдерә алмаган.
Сораштыру күрсәткәнчә, әтиләр бу тыюны әниләргә караганда бераз ешрак хуплый. Ир-атларның 84 проценты дәрестә телефон кирәк түгел дип санаса, әниләр арасында бу күрсәткеч 82 процент тәшкил итә.
Укытучылар арасында да әлеге инициатива киң хуплау тапкан. Педагогларның 86 проценты дәрес вакытында телефоннарны куллануны тыю яклы булуын әйткән. 9 проценты каршы чыккан, ә 5 проценты җавап бирергә кыенсынган.
Белгечләр фикеренчә, смартфоннар укучыларның игътибарын читкә юнәлтә, дәрес барышында концентрацияне киметә һәм уку сыйфатына тискәре йогынты ясый ала. Шул ук вакытта кайбер әти-әниләр гадәттән тыш хәлләрдә бала белән элемтәдә булу мөмкинлеге сакланырга тиеш дип саный.
Мәктәпләрдә телефон куллану темасы соңгы елларда иң бәхәсле мәсьәләләрнең берсе булып кала. Берәүләр моны дисциплина өчен кирәк дип санаса, икенчеләре заманча технологияләрне тулысынча тыю дөрес түгел дип исәпли.
